OGGIU 'E LESTINCU - Poesiasa de Baddore Sini in limba 'e Mesania de Busache
Autori: Salvatore Sini

Presentazione: "Una die Calliope, sa musa de Elicona...", issa maturidade de sa vida mia, m'a' guidau issas carrellasa de so' buscoso de Parnasu imparandommi a iscriere callecunu versu. Appo comunciau a giogu issu triballu de insegnamentu cumponendo paris cussos piccioccheddoso cantos po sa' festa de fine annu o po cummediasa de ambiente o de argumentu istoricu.
Sa pubblicatzione chere' giare unu contributu a s'espressione de so' sentimentoso de s'anima umana in versoso issa limba chi babbu e mamma m'ant imparau dae cando fui piccioccheddu.
S'iscrittura dae unu latu arrespèttada criterio' generallese accettaos dae tottusu, ma dae s'atteru chere' mantennere s'ispecificidade de sa limba 'e Mesania de Busache, pagu connotta in Sardigna.
Su titullu "Oggiu 'e lestincu" anticipada ca so' versoso no arregordanta so' dellicaos saborese de s'oggiu extravergine de ollia adattu a gente raffinada, ma prus cussos antigoso e unu pagu marigososo de sos tempos passaoso, cando in Busache e in tottu sa Sardigna sa' femminas andanta a su monte a frigare lestincu e ponianta s'oggiu no sollu po allue' lantionese, ma finzese po frie' coccoiasa sa die chi faianta su pane.
Fotzisi, andand' andando, ecchie leggidi ada a poder agattare callencun' istiddigu de oggiu 'e ollia... Baddore Sini
Finiu de istampare in su mese de maju de su 2006 in sa Tipografia Ghilarzese - Ghilarza - Via Zuri, 5